E como peche das actividades do mes de abril, adicado aos libros e charlas sobre a situación e a historia das mulleres, tivemos o martes 24 na Casa das Letras de Ribadeo a presentación do libro "Tres mulleres galegas de armas tomar: María Balteira, María Castaña e María Soliña" (Baía Edicións), de Guillermina Domínguez e Felicia Estévez. Foi un  privilexio  contar coas autoras para a presentación do libro que, ademais, aproveitaron para facernos unha pequena presentación sobre a invisibilidade das mulleres na historia e na arte. 

Nova denuncia pública do Observatorio da Mariña pola Igualdade, desta volta demandando máis políticas de prevención e de mellora na atención directa ás vítimas da violencia machista:

Os efectos da crise son demoledores para a sociedade en xeral pero nela as mulleres son dobremente agredidas, como cidadás e como mulleres. Mais cabe salientar e enfatizar que esta crise non é só unha crise económica, senón de valores. As medidas que o sistema actual está impoñendo non veñen máis que a favorecer a uns poucos e a perxudicar aínda máis á grande parte da poboación. Máis medidas deste tipo conlevan máis recesión, máis pobreza e maior feminización desa pobreza. 

"desTAPA a igualdade. porque así gañamos tod@s". Ese é o lema que lucirá nas servilletas do bares participantes no Ribadeo de Tapeo 2012. O Observatorio da Mariña pola Igualdade aproveitará a VII Edición do concurso do Ribadeo de Tapeo, que se celebrará entre o 18 e o 27 de maio, para facer unha campaña a prol da igualdade de xénero na vila. Para elo, repartiránse 140.000 servilletas co lema "desTAPA a igualdade. porque así gañamos tod@s" entre os 51 bares participantes este ano no concurso coa fin de que, durante os días que dure o tapeo, sexan utilizadas por toda a xente que se anime a degustar as distintas tapas. 

O pasado xoves 19 de abril recuperamos o ciclo de charlas-café falemos de... Como xa sabedes nestas charlas tratamos temas de actualidade e, como peculiaridade, lévanse a cabo nun ambiente informal e mentres gozamos dunha consumición. Desta volta, a pesar de que non se fixo nunha cafetería senón na Casa das Letras de Ribadeo, non faltaron o café, o cacao e o bo ambiente. Os Feminicidios: de Ciudad Juárez a Europa, foi o tema escollido nesta ocasión e, para explicarnos mellor esta realidade, tivemos a sorte de contar con nós con Sonia Herrera Sánchez, licenciada en comunicación audiovisual pola Universidad Autónoma de Barcelona e especialista en comunicación educativa, xornalismo, conflictos armados e igualdade de xénero.